تليفونى مش عطلان

تليفونى مش عطلان 
(قصص من حياة أبونا بيشوى كامل)

 

فى إحدى المرات سمع أبونا بيشوى كامل طرقاً على الباب ، فذهب ليفتح ، فإذا به يجد عامل التليفونات ; ودار بينهم الحديث التالى :

عامل التليفونات : مساء الخير

أبونا بيشوى كامل : مساء النور .. خير فى حاجة ؟!

العامل : ايوه .. فين التليفون العطلان ؟

أبونا : تليفون عطلان .. لازم أنت غلطان فى العنوان ..

العامل : هو مش حضرتك سيادة القس بيشوى كامل .. ؟

أبونا : أيوه .. لكن تليفونى مش عطلان .!

 العامل : أمال ايه الحكاية بقى ؟؟ 

ده يا سيدى جت ولا ميت شكوى للمصلحة بيقولوا ان التليفون بتاع سيادتك مش بينطق ، وكل ما يتصلوا بالنمرة ماحدش يرد عليهم ..!!

أبونا : اه .. ده أنا أصلى وقت راحتى ساعة الظهرية بأرفع سماعه التليفون علشان ماحدش يزعجنى وأعرف أنام شوية علشان أكمل عملى بالليل .

العامل : وقت راحتك إيه .. وترفع السماعه إيه ..! وتليفونات وإزعاج فى المصلحة .. لو أنت مش قدها بقيت قسيس ليه .؟

فسكت أبونا بيشوى كامل قليلاً ثم رد عليه بهدوء قائلاً : " معلش يأخ .. أنا أوعدك أن مفيش شكاوى هتوصل المصلحة تانى .. مع السلامة " 

العامل : مع السلامة يا سيدى .

أنصرف العامل ، وركع ابونا بيشوى كامل امام صورة المسيح المصلوب وصلى .. 

" ياربى يسوع أشكرك لانك وصلت لى هذه الرسالة اليوم على لسان عامل التليفونات .. يارب أنا من أجلك سوف أضحى بوقت راحتى ، رغم علمى بإنى لو تمسكت به فإنك لن تحاسبنى .. لكنى بنعمتك سأحاول أن أنفذ الآيه من أضاع نفسه من اجلى يجدها ، ساعدنى ياإلهى لأنى لن أستطيع شيئاً بدونك "